Column: Overledenen: Zie bint ‘uut de tied’ ekummen
AlgemeenHeldern - ’t Aolde kärkhof is ne plekke van bezinning, waor a-j effies könt óntsnappen an de haost van ‘t daegelijks lèven. As echten Heldersen zöl iej ne binding vuulen met disse plekke.
Het is de leste röstplaetse van oonze veuraolders. Zie bint ‘uut de tied’ ekummen. Het Nedersaksisch umschrif det better dan het Nederlaands. D’n aoverledenen maekt ja gin deel meer uut van oonze tied en wereld die aaltied maer in bewèging bint.
Umme de kärke
Van oonzen eersten koning Willem moch d’r nîet meer in en umme de kärke begraeven wörden. Vanwege hygiëne môs det umsgeliek 200 meter buten ’t dorp gebeuren. En zo kwammen ze op d’n Vennemanskaamp terechte. Völle geld veur de anleg was d’r nîet. Vandaor det d’r deurnige struken eplaetst mochten wörden langs d’n raand in plaetse van ne stenen mure.
A-j in ’t achterste gedeelte van d’n hof richting de Hofmansweide kiekt, dan is ’t net o-j ne kârkvloere zîet. Alle stene ligt daor stief nööst mekaer. Met de vûute ligt de lûu naor ’t oosten, in ofwachting van de wederópstanding. De aolde grafstîene met eer verweerde ópschriften vertelt aover eer lèvens. De îekenbeume die ’t kärkhof umringt fluustert de verhalen van de lûu die hier röst.
De ègen röste
Iej könt daor zölf kuieren en overpeinzen hoe kort oons lèven is in ‘t grotere geheel van de tied. Het is gôed veur de ègen röste umme daor of en tôe een bezûuk te brengen. Maer lîever nîet de-j d’r oewen hónd zien behôefte laot dôene. Lao’w ’t zo zeggen: wie schijt an de veuraolders hef, hef in principe schijt an zichzölf. Det wil d’r gin iene toch?
Werkgroep
De werkgroep ‘Luu veur oald niejs sprokkel’n’ maakt deel uit van de Historische Kring Hellendoorn-Nijverdal en verzamelt uiteenlopende verhalen met bijbehorend beeldmateriaal over het leven in onze gemeente in vroegere tijden. Elke maand delen zij een van die verhalen in het dialect met alle inwoners van onze gemeente. Heeft u een interessant verhaal of beeldmateriaal? Laat het weten via oaldniejs@gmail.com.
Tekst: Evelyn Ligtenberg/Oald niejs sprokkeln
